Bonyongo

Ndi Malabi!

"Vho zwi pfa naa zwi no khou ambiwa nga mufumakadzi wa murathu wavho? Houḽa musidzana ngoho u a kola nga khaladzi nga Nṱhupe ṅwana wa mme anga muthihi fhedzi!" Ndi Ndishavhelafhi a no ralo o zwondolola munna wawe Tshiginya. 

"No thoma mavhari-vhari anu a si na musi thiri! Hu pfi uri mini nga nnyi ṋamusi? Ni thanyele vhomutandangauwe ri wane makwati a u vhasa mulilo! Zwa sa ralo ḽiṅwe ḓuvha ni ḓo ḓiwana ni khakhathini i sa takuwi fhasi." Uyu o vha Tshiginya a tshi khou tsivhudza muthu wawe. 

Kha ḽoṱhe ḽa Posaiṱo a hu na a sa ḓivhi Tshiginya na mufumakadzi wawe Ndishavhelafhi. Avha vhavhili vha ḓivhea nge munyanya wavho wa mbingano we wa vha munyanya wa ṅwaha kha ḽa muno. Zwo rali vha dzula vhe milomoni ya vhathu na u dzula vhathu vho vha ingamela u vhona zwivhuya zwi no tshimbila na mbingano iyi. Tshine tsha khou nga u dina zwa zwino ndi tsha u sa vha na vhana ha avha vhavhili. 

Seani mufumakadzi wa murathu wa Tshiginya o ri u dzhena afha muṱani wa Hamunyai, hu si kale a mbo ḓi vhonala o naka, o no gonya miri, hu si kale a tsa nga kusidzana. Vhakegulu vha takala vha thoma u imbelela luimbo lwa matakadzambiluni ndi ṅwana! Kha Vho-Ndishavhelafhi a zwo ngo ralo lini. Vhunzhi ha vhadzulapo vha tshee vho komolela vha ṱoḓou vhona uri mini ndi mini. 

Malugana na iḽi fhungo Seani mufumakadzi wa murathu wa Tshiginya u dzulela u isedzela phungo mukomana wawe nga vhumba hawe. "Nangwe wa vha mushumi wa biko vhuhadzi arali u meila i sa bebi a hu na tshi no naka! U ḓo vhuya a tou vhofhelela malabi uri a si shakuliswe nga munna!" A no amba nga u rali ndi Seani a tshi khou sea. 

Hu tou nga Mudzimu o vhuya a pfa tshililo tshawe o mu aravha! Maḓuvha ano u vho tou penya sa dzinga ḽi ḓuvhani." Ndi Vho-Tshinakaho vha no ralo vha tshi khou ṱoḓou pfa zwa hanwani ha Seani. 

"Nṋe a thi kholwi uri hu na tshithu hafhaḽa! Ṅwana ha rengwi Shoprite lini! U ḓo zwi pfa nga u ḽa mindaandaane ya dziṅanga musidzana! Naho a ralo u nwa madzovhelo na u guma miuluso a hu na tshi ḓaho, khetshi nga khaladzi! Houḽa muthu vha mu ḓivhaho vha mu fhedza vhe o dzhulumbesa, ṋowa yawe yo kwangwala! U ḓo vhuya a tou renga ṅwana vhengeleni! "Ndi Seani a tshi khou sea na ṱhama dzawe. 

"Vhathu litshani u vumba ṅwana wa muṅwe muthu mutsho sa mukukulume u tshi vumba mutsho muswa wa ḓuvha! Zwi a dzhenisa muthu mabanndani hezwi zwine na khou ita zwone! Hu ḓivha nnyi, ḽiṅwe ḓuvha zwi ḓo vhuya zwa mu nakela-vho sa vhaṅwe vhasadzi!" Vha no amba nga u ralo ndi Vho-Tshinakaho vha tshi khou sea tshiseo tsha mmbwa. 

Vho-Ndishavhelafhi vha vhonala maḓuvhano vho fara nḓila ya u ya kiḽiniki vha sa fhedzi. Musi mugennge uyu u tshi mu vhona u tou fa nga maseo thovhele. Muhadzinga wawe u mbo ḓi ri a hu na ṅwana ndi malabi e a ralo u ḓivhofhelela uri a si pandelwe nga munna. "Vhokhotsimuhulu kana iyi mbonzhe vha i fuwela mini a thi ḓivhi. Ndi khwine vha tshi i longa baḓa zwa ya na vhusula. Vhasidzana vhavhuḓi ndi vhanzhi hafha Posaiṱo!" Vha ralo Vho-Seani vha tshi khou nyefula mukomana. 

Dzi a vhuya Vhuronga ḽa Vho-Vhangani. Zwa u ya tshikaloni ha Ndishavhelafhi zwo sia Vho-Seani vho tou ṱanga madalo a u ya kiḽiniki ya muno u vhudzisesa arali nga ngoho Vho-Ndishavhelafhi vho naka. Muongi Sostina o tou lamba u pfa Vho-Seani vha tshi vhudzisa nga ha Vho-Ndishavhelafhi a mbo ḓi sinyuwa sa nngwe yo ponyokiswa kha tshilibane tsha murei makone. 

"Vhone Vho-Seani, mathina vhathu a vha vha zwifheli vha tshi ri vha na mulomo mulapfu u no nga wa ṱhungununu. Vho no zwi pfa'fhi zwa mutakalo wa muṅwe u tshi vhudzwa muṅwe! Kani ndi vha vhidzele mapholisa a ḓe a vha kakate? Vha songo vuwa vho zwi dovha hezwo zwine vha khou lora zwone masiari vha songo fara khofhe! Vivho ḽavho ḽi no nga ḽa muloi vha ḽi litshe vha sa athu u ḓiovhela khombo! "Vha no amba nga u rali vho vha Vho-Sostina vho guma fola. 

Ndi fhaḽa Vho-Seani vha tshi bva vho niwa nga ṱhoni sa tshiṱoni. Khevha vho tou longondo na bada yavho vho livha Posaiṱo." Hoyu nese kha kundwe o rengwa nga hoyu muhadzinga wanga! Hafhu vhathu vha re na matshelede a vha kundwi nga tshithu hafha mavuni. A tshi vho bula ḽa mapholisa zwino! Atshi, hafhu nṋe ndi na khombo i no nga ya badani. Areḓi, zwo kunda vhalala, zwi kha ḓi ḓo konwa nga nnyi? "Ndi Vho-Seani vha no rali vho ongomala sa vothi ḽa vongori. 

U swika fhaḽa ḽikululini Vho-Seani vha fara gondo ḽa nṱha ha miḓi. Izwi ho vha u itela uri vha si ṱangane na ṱhama yavho Vho-Tshinakaho uri vha si vha dine nga dzimbudziso. U swika hayani muthada ya tou thoma ya kuvhama nga mbiti dzi no nga dza ṱamaṱisi ḽo vhibvesa. Muongi Sostina o vha ṱila mufuvha masiari ḓuvha ḽi nṱha ha ṱhoho. 

Hu sa athu na u fhela tshifhinga tshi sa ḽisi mbilu Vho-Ndishavhelafhi vha fhaṱutshedzwa nga murwa. Dakalo ḽa vha ḽihulu kha Vho-Ndishavhelafhi na Tshiginya. Vho-Ndishavhelafhi vho bva samba ḽi no nga ḽa vhuvhava ha mbava. Kha Vho-Seani ho sala mashonelo na zwisolo fhedzi. 

Phungo ya vhuumba ha Vho-Ndishavhelafhi ya swika kha khotsimunene nga Vho-Tshinakaho. Ndi fhaḽa vha tshi fhelekedzwa ha havho u yo u thoma vha laiwa. Nga ngoho zwa ralo. Vho-Seani vha vho pfala vha tshi ri vho funḓedzwa nga ṱhama dzavho u lukela muhadzinga vhumbulu uhu. Maḓi a tevhuwa o tevhuwa u kumbela a u tsha ḓadza.