Maluvha a Lushaka
Share
BUY HERE
- Maluvha a lushaka
Vharangaphanḓa vha ngoho vha lushaka,
Vhane vha ranga lushaka nga ngoho na vhudele,
Vha shandula vhadzulapo vhoṱhe sa mashaka,
Vhathu vhoṱhe vha takala vha shanduka dzindele.
Vhatambi vha mitambo yoṱhe vhomakone,
Nga mivhili yavho vha ita vhuhulu vhuṱolo,
Nḓila dzavho vha vhonetshela nga dzavho mbone,
Mishumo yavho ya vha shandula tshi nukhelelaho tshiḓolo.
Ṋambi dzashu dzi no imba sa zwiṋoni,
Milomo yadzo ya bveledza vhuhulu vhuṋambi,
Lushaka lwa ḓivhona makovhi alwo nga tshivhoni,
Vhatsinda u ingamela vha akhamala sa madambi.
Vhomme vha lushaka lwashu lwa matshelo,
Vhane vha konḓelela vhuṱungu ha mbebo sa tshikhopha,
Shandulani vhana vhanu vha ḓifhe sa mutshelo,
Ni songo ṱalela u shashata ha mbeu ya anu malofha.
Vhavhumbi vha mikhwa mivhuya na mvelele,
Dededzani vhaswa vhashu nga vhulenda na pfanelo.
Mikhwa yavho i ḓifhele lushaka sa mutuku na delele,
Lushaka shangoni lu si tshile nga u tswimila na thabelo.
Vhaḓivhi vha malwadze na mishonga ya dzilafho,
Bveledzani dza u tshidza na u tsireledza lushaka phila.
Lushaka lu thube dakalo ḽihulu lu tshile nga u ṱonga,
Musi lwo wana vhu sa fheli vhutshilo.
Vhatsireledzi vha lushaka vha sa ḓivhi khofhe, Shumani ni sa neti ni edze vhusunzi.
Vho phirimelaho ni vha bvise ngomu kha thophe,
Ni shanduke dzi si na tshiṱalula kha muthu khunzi.
Vhoramabindu vha lwahashu lushaka,
Ikonomi vhumbani yo khwaṱhaho sa murenzhe.
Lushaka lu fhedzwe ḽa nḓala ḽihulu sakha,
Lushaka lu ḓiphine ḽu ṋone sa musenzhe.
Vhana vhashu vhane ra vha funa,
Futelelani kha pfunzo sa pfunzi.
Pfunzo i ḓo ni nea luhulu lukuna,
Lushaka lwahanu na shumela sa mufunzi.
Vhabveledzi vha a maṱo makolo,
Vhumbani i kanukisaho mitshini.
Ngayo ri bveledze vhu akhamadzaho vhuṱolo,
Zwivhuya zwi anwe sa mitshelo miḓini.
- Zwi si tshithu!
Zwi si tshithu u zwi nea vhuhulu vhugala,
Zwi re tshithu wa zwi hoṱefhadza sa tshirole.
U ṱoḓa uri lushaka lwoṱhe lu sale lwo mangala,
Musi nḓadzi i tshi rwa muthu hu si na makole.
Ṋama yau u i shandula luhulu lupfumo,
Muya wa u kwanyeledza sa vhele tsheneni.
U takadzwa nga u fuka ḽihulu bvumo,
A u vhilaeli u kudza muya wau heleni.
U tambula nga u kuvhanganya mabammbiri,
Zwi no fusha ya muthu thumbu wa balanganya.
Wa ṱongelela wa ḓipfa wo khwaṱha sa danda ḽa musimbiri,
Musi ngelekanyo yau yo kambiwa sa o nwaho muvanya.
Mishumo yau u i shuma nga u ḓihudza na mavhonwa,
Gwama ḽihulu wa zwala mavuni sa ya mavhele mbeu.
Wa ḓishandula wa lushaka lwahau makhonya,
Musi u tshi khou gabaila phanḓa wo haka deu.
Tshidzimu tshau tsha mbiluni ndi ya u renga ndalama,
A u teledzi u fhaladza malofha u tshi ṱoḓa yone,
Wo ṱanutshela Mudzimu wau u gwadamela gwama,
U khukhuna vhusiku sa muloi u tshi zwima yone.
- Gavhelo ḽa vhana
Tshelede ya Muvhuso yo wa mpale,
U tshi i ṱoḓa u tea u bebesa.
Muleli wa vhushie u humbele mazwale,
Uri tshi u penyele sa vhaṅwe tshedza.
Vhana'nga vha nṋea muhulu muholo,
Nda kwasha tshitolo nda renga madzanga.
Nda ambara nda fanelwa nda shanduka mukololo,
Mavhala anga o naka sa a khanga.
Nnḓu ya mahala ndo fhaṱelwa mahoḽa,
Tshifhefho tsho vhuya na mphwe dzatsho.
Ndi ṱamba nda ḓola nda ima badani sa ḓarata,
U fhedza u tamba ra rwa tshihulu tshifhere.
Masheleni a si na vhukono ndi a 'sapoto',
Vhokhotsi vhana vha ṱahulela vhana sa tsimu.
Nda amba ndi a pfiwa-vho nga vhorazwipoto,
Ndalama yo shanduka tshanga tshidzimu.
Bindu ḽa u rengisa muvhili ḽi khou tshimbila zwavhuḓi,
Ludzula kha nṋe lwo anda sa dza mbudzi thokhonono.
Zwigwili ndi ṱuḓa sa wa halwa ha mahafhe muṱuḓi,
Vhutshilo hanga ho naka sa ha tsha ḓaka tshikhokhonono.
Vharengi vhanzhi vha lamba u shumisa khondomu,
Vhenevha ndi tshira tsha a vhudzekani malwadze.
Vha ḓo shengela nga u ṱoḓa tsha tsimu ṱhavhatshikomu,
Zwa ralo vha ḓo lila nga vhuṱungu ha mbebo sa mudzadze.
Nṋe ndo kavhiwa nga ḽa malofha dzwadze,
Shango ḽoṱhe ndi ḓo ḽi fhoma nga vhu no ṱhoṱhona vhulaḓa.
Vhanna vha sa ḓilondi vha ḓo ḓihwenga vha lila sa mulwadze,
Musi vha tshi khou ḓiphina nga tsha mulimo tshiṱakaḓa.
- Mu tupuleni!
Ro mu tupula sa tsheṋe ngauri ndi ḽivhanga,
O ri shandukela sa matshele a ḓuvha.
U bikela maswina a ḓifhesaho madzanga,
U ri vhidza nga madzina ri tshi tamba mufuvha.
U hanedza zwoṱhe zwine ra amba,
U anea maano ashu sa mukusule.
Luambo lwawe lu anza maṱamba,
Ri ḓo mu fasha sa khovhe nga mambule.
U ṱonga na u ḓihudza sa matunde,
U bula zwa vhahulwane zwiphiri.
U dziba sa tsha mushigidzhane tshihunḓe,
Mbilu yawe yo swifhala sa ya tshivhimbili.
Ro mu bvisa vhurotho mulomoni,
U ḓo ḽa nnda a sevha nga gai.
Ri ḓo mu ṱhaṱha sa ṱhaṱhe mililoni,
Uri vhutshilo hawe vhu shanduke thai.
Ro mu sumbedza maṋo e ri dziṱhama,
Ngeno mbilu dzashu dzo dzikuwa sa tshisima.
U lamba u ri pamba ḽa u renga gwama,
Ri ḓo mu rambela tsha vhufhelo hawe tshimima.
- Bvumelani zwi nake!
Ndo sima luimbo lwa malende,
Bvumelani ndi tshine sa ḽinnḓaganana,
Ni songo shona u imba nga u shavha mavhende,
Ṋamusi ni ḓo ḽa na nwa na fura sa tshiṋaṋa.
Vha no hana u bvumela ndi mavhanga,
Mavhanga a no vhanga vhukoma a songo babelwa,
Ḽivhanga ḽi pika ḽihulu ḽaḽo danga,
Musi sa mbava ḽi tshi ḓiwana ḽo honelwa.
Rine ro newa ya u amba mbofholowo,
A ri nga tendi u vha vhomukuzhavhayaho,
Vhane sa tshidimela vha tambula nga u songolowa,
Vhumenemene vha pembedza vhu mangadzaho.
A ro ngo ambara tsha nyofho tshiambaro,
Vhumatshelo hashu vhu kha yashu ndaulo,
Dzanga ḽa khanyo yashu ro vhulunga kha mufaro,
Ri na yo khwaṱhaho yo dzikaho mihumbulo.
Vhaṅwe vho shanduka a ngelekanyo mabofu,
Vha ralo u swinga masiari ḓuvha ḽo andamela.
Mveledziso kha vhone yo fhela vha ḓiita zwipofu,
Dzivhani ḽa thophe sa phukha vha phirimela.