Mudzi Wa Muthu
Share
BUY HERE
- Mudzi wa Muthu
Mudzi wa muthu ndi Mudzimu,
Muthu tshifanyiso tsha Mudzimu.
Mudzimu a sa dzimi muthu madzanga.
Muthu a takala a pembela o takula tsanga.
Mudzi wa muthu ndi vhubvo ha muthu,
Mudzi wa muthu ndi murunzi wa muthu.
Mudzi wa muthu ndi wa muthu mushonga,
Muthu a muna mudzi a fhola malwadze a ṱonga.
Mudzi ndi mudzimu murangi na muvuledzi,
Mudzimu a vhea muthu tsimuni a anda sa ṋaledzi.
Muthu a thetshelesa vhumbulu ha swina,
Muthu a bviswa vhugalani a shaya u ḓiphina.
Muthu a songo hangwa ha Mudzi vhubvo hawe,
Muthu a songo hangwa Mudzi vhuyo hawe.
Muthu tshifanyiso tsha Wawe Musiki,
Muya wawe u ṱoḓa ha mudzimu vhudziki.
Mudzi u nea muthu u rotholelaho murunzi,
Mudzi u nea muthu mitshelo na masheleni.
Muthu u shumisa mudzi a shanduka khunzi,
Muthu na mudzi ndi dziṱhama vha neana mapeni.
Ṋama ya muthu i bva hune mudzi wa vha hone,
I tshi fa i shanduka zwiḽiwa zwa mudzi.
Ṋama i fhedza ya mudzi khulu nḓala,
Muya u vhuyelela ṱaḓulu nḓuni Yawe.
Pharadisoni a hu na mudzi a hu na thambulo,
Mudzi a u lafhi maṱungu na malwadze.
Mudzimu ha na vhuaḓa na vhumbulu ha mudzi,
Mudzi a u tsha vhanga muvhango wa mavhanga.
- Ṱhama ya lufu ndi nnyi?
Ndi nnyi ṱhama ya lufu?
Ndi nnyi ane a lu ruma lwa tenda?
Lufu a lu vhoni ndi bofu!
Lufu kani lu na vhulenda?
Ṱhama ya lufu a i lu thetsheli,
I tshila vhutshilo vhu sa fheli.
A i fi a i nga dzheni ḽivhiḓani,
Ndi mukololo muhulu wa saṱhani
Vhuṱungu ha lufu a vhu u ṱungufhadzi,
Ha tambuli nga a mulwadze mavhadzi.
Zwi tshi konḓa u zwi kumedza makhadzi,
Musadzi ane a dzhena nḓuni na muṅadzi.
Lufu lwa muṅwe kha iwe lu nga mutambo,
Mashaka vha tshi lila vha nga masweule.
Muthu a songo ḓowela u vusa zwiambo,
Ngauri ḓuvha ḽa mbidzo yau ndi tshibulebule.
Nyadzawela vhaṅwe vhathu wa setshelela,
Matshelo na iwe zwivhi zwi ḓo u wela-vho.
U si vhone shamba murambani u ṋembelela,
Ḽiṅwe ḓuvha u ḓo nwa maḓi nga yalo khavho.
Muthu ndi muthu nga vhaṅwe vhathu,
Muimawoga shaka ndi nnyi shangoni.
Tshihulwane tsha muthu ndi u bveledza vhuthu,
Wa litsha u kudza vhutshilo hau muliloni.
- Hu khou itea mini?
Hu khou itea mini?
Shangoni ḽa zwinzhi.
Maṱhupho a ḓo fhela lini?
Vhashai vha ḓiphina nga mushidzhi?
Vhaṅwe vha lala na nḓala,
Vhaṅwe vha lala mikhukhuni.
Lushaka lwa hashu lu a lwala,
Vhadzulapo vha ṱoḓa khuni.
Khethululo yo vhanga khulu khuḓano,
Tshiṱalula tsho ri vhangela dziphambano.
Lupfumo lwa vhushaka a lu kovhiwi nga pfanelo,
Vhaṅwe vhathu vha tshila nga khumbelo na thabelo.
Lupfumo lu zwanḓani zwa vha si gathi,
Vhashai vha khou vhilaela u wana maḓi.
Vhadzulapo vha khou shengela sa gwaḓi,
Tshitshavha tshi khou tambula nga phaḓi.
- Muloro wavhuḓi
Ndo lora muloro wavhuḓi,
Ndi muloro wa munna mupfumi.
Ndi ḓo fhaṱa wa manaka-naka muḓi,
Khamusi ndi ḓo awela zwivhi zwilumi.
Ndo lora ndo shanduka nzhinga,
Ndo pfuma na zwa milenzhe zwikunwe.
Nda ambara maṱongo nda penya sa dzinga,
Nda ṱutshela ḽo vhifhaho ḽilapfu gunwe.
Ndi tshi karuwa nda wana uri a si ngoho,
Miloro mathina i a kola sa mukololo.
Yo ntshandula wo ṱhowaho muroho,
Mutshimbilo wanga u vho nga wa ḓongololo.
5. Tshifhinga
Tshifhinga ndi tshino,
Tsha u tshintsha zwithu.
Shandula shango ḽino,
Ni si ḓishandule madithu.
Tshifhinga tshino ndi tshone,
Ndi tshone tsha yashu tshanduko.
Vhathu vhoṱhe fungani mbone,
Ni dzule vhuralani sa mvuko.
Tshifhinga tshone ndi tshino,
Tshine wa tea u sumbedza vhukoni.
Mveledziso yau u dzudzanye zwino,
U fhufhele tshikhalani sa goni.
U songo temba ḓuvha ḽa matshelo,
Matshelo haho a re hone ndi ṋamusi.
Themba ya Mudzimu wau thabelo,
Khaṅwe u nga thuba tshiṅwe khamusi.