Nyambedzano na Vhadzimu
Share
BUY HERE
- Nyambedzano na Vhadzimu
Khotsi anga vho ṱuwa ndi songo humbula,
Tsha mbiluni yanga tshiphiri ndi songo putulula.
A thi tshee na wa u vhudza a mbiluni mafhungo,
Ndi khou tambula nga nndwa i si na makungo.
Vhuleme hanga ndi vhu vhudza vhanga vhadzimu,
Uri ndi yelwe nga phungo sa mulimi wa tsimu.
Ndi ṱoḓa uri zwanga zwi nake zwi fane na zwa vhaṅwe,
Ndi shanduke wa vhadzimu mukololo kaṅwe.
Vhutshilo hanga ho shanduka tshilonda tsha ṅwatela,
Na u phupha hani mishonga a tshi tendi u fhola.
Vhutungu ha vhavha sa ha dza ṋotshi mbolela,
Murahu ha vhuṱungu sa tshisele nda ḓiphina nga mutoli.
Ndayo ndi ḓo dzi ṱuvha sa i si na vhabebi tsiwana,
Lufuno lwa khotsi kha nṋe lwo shanduka muloro.
Ndi tambula nga u pfa vhuṱungu ha lidza tshihwana,
Tshiḽiwa tshanga tshone-tshone ndi maḓoro.
Ṱhangu dzi ri ndi fanela u tika luhulu luvhambo,
Ndi ḓo phaselwa nga nnyi ndo luṱana na makhadzi?
Vhe vha ḓo phasa nga a u fhisa maḓi hu si a mulambo,
Vhuluṱa ho vhangwa nga nzeo ya wanga musadzi.
Vhadzimu vhe hu rendwe vha hakhotsi na hamme,
Ni tshi ralo ni songo hangwa khambana ya fola.
Ndi tama uri zwivhuya ḽinwe ḓuvha na nṋe,
Zwi nnakele sa khomba nda ṱamba nda ḓola.
Maṱungu na zwiṱhavhi sa tshinoni zwi fhufhe,
Ndi rwiwe nga muya musekene sa vhaṅwe - vho.
Ndi awele u dzula ndo phirimela thopheni sa nguluvhe,
A mone-mone na u vhimbila nga dakalo wa Vhakwevho.
- Mulalo
Mulalo shangoni ḽashu ,
Ndi tshone tshililelwa tshashu.
Vhathu vhoṱhe vha tshile nga dakalo,
Vha si kumbuludzwe sa makukwe nga magabelo.
Mulalo shangoni loṱhe,
U ṱoḓea sa ya u renga ndalama.
Vhathu vha takala vha lalama vhoṱhe,
Vha shanduka khulu dziṱhama.
Mulalo miṱani yashu,
Wa fhefheḓa sa muya.
Ra ḓiphina nga pfanelo dzashu,
Roṱhe sa mboho ra kuma.
Mulalo ngelekanyoni dzashu,
Wa funzwa sa ngei tshikoloni.
Ra nakisa zwoṱhe zwi re zwashu,
Lushaka lwa bva khomboni.
Mulalo wa vha hone ra lala khofhe,
Mishumo mivhuya ra pembedza.
Ra ḓiphina nga mihulu mikovhe,
Vhuvhi ra anzwedza ra fhedza.
- Tshilidzi tshawe tshi mangadzaho
Tshilidzi tshi mangadzaho tsho bvelela dangani ḽa bere,
Musi Maria musidzana a tshi ṱanganedza Murena.
Vhannḓa vha ingamela vha devha tshihulu tshifhere,
Musi tsiko ya muthu yo thuba vhuhulu vhugwena.
Tshilidzi tshi mangadzaho tsho vhonala kha mukungwa,
Musi lushie nga ngomu hawo tshidele lwo eḓedzwa.
Phindulo yone Lushaka lwa netshedzwa nga muruṅwa,
Thabelo ya u amba na Khotsi lushaka lwa funḓedzwa.
Tshilidzi tshi mangadzaho tsho vhonala kha tshifhambano,
Musi malofha a ngwana a tshi shuluwa sa maḓi a mulambo.
Phambano sa mufu ḽivhiḓani dza fukedzwa ha siṅwa pfano,
Lushaka lwa awela u shengela nga u tshina asili malombo.
Tshilidzi tshi mangadzaho tsho vhonala nga ya Murena mvuwo,
Musi a tshi kunda maanḓa a lufu na phangami ya vhuhulu vhuvhi.
Muvhuso wa muvhi wa dzhenwa nga nyofho na ḽihulu dzhenuwo,
Musi vhutande-tande ha muvho ho tandululwa sa lubuvhi.
- Tshifhinga ndi tshino!
Tshifhinga ndi tshino tsha u ita zwithu,
Musi Mudzimu a tshee o u nea vhutshilo.
U sa athu u shanduka ḽi ofhisaho ḓithu,
Vhathu vha u vhona vha ṱuwa nga luvhilo.
Tshifhinga tsho fanelaho vhugala ndi tshino,
Mabono mahulu bveledza mbilu yo takala.
U phethe mishumo yau yoṱhe hu tshee zwino,
Zwoṱhe zwine wa humbula u shume u khagala.
Miṱangano na mashaka u vuledze ṋamusi,
Matshelo ha ho ha ḓivhiwi nga muthu.
Wa elekanya uri matshelo u ḓo awela vhutsi,
Wa dzula fhasi wa ḓiphuna na mavhuthu.
Tshifhinga ndi tshino tsha u bveledza zwivhuya,
Lushaka lu range phanḓa nga u fulufhedzea na ngoho.
Maḓuvha oṱhe a vhutshilo hau bveledza phungombuya,
Nyito iyi i ḓo u shandula ya lushaka lwa hau mboho.
Ṱavhanya u bveledze ha ngelekanyo yau vhuṱolo,
Lushaka lwahau u shumele u sa neti u sa teledzi.
U fhedze dza lushaka mbilaelo u lu ḓolise tshiḓolo,
Mishoni ya mvelele u ende wo bvuḓa sa tshedzi.
Vhudzula-vhafu a hu na tshithu ndi swiswi fhedzi,
Shangoni ḽa vha no lala vha si kone u rembuluwa.
Vhutshilo havho ha mbo shanduka ḽifhedzi ḽa fhedzi,
Musi vha tshi tshimbila vho tshena sa mukhuwa.
- Swiswi ḽa ngelekanyo
Ndi ngani u tshi funga luvhone wa lu dzumba nkhoni?
Lushaka lwahau lwa pupudzika swiswini sa bofu.
Nyito yau ya kudza lushaka lwoṱhe khomboni,
Ngeno vhutshilo hau u tshi vhu ḓifhisa sa khobvu.
Wa thivhela ya muṅwe muthu mveledziso,
Nge wa shumisa vhuhulu vhutsilu na vivho
Wa vhudziswa wa lamba u fhindula mbudziso,
Nge mbilu yau ya fuka i no nga ya pfeṋe mbifho.
Mishumo yau yoṱhe u i shuma nga muhoyo,
Mbilu yau yo vhifha na u swifhala nga vhuvhi.
U setshela'ni vhanwe na iwe tsindi i goyokoyo,
Wa tandedza vhutande-tande vhu no nga ha buvhi.
Nyambo yau yo anda zwitshele na tsatsaladzo,
A u koni u khoḓa tsho itwaho nga muṅwe muthu.
Vhaṱuku na vhahulwane wo vha itela tshimangadzo,
U nyowelwa na u vhonelelwa nga maṱo a mavhuthu.
Kunakisai ngelekanyo yau i penye sa musuku,
Swiswi mbiluni yau u ḽi shakulise sa pfeṋe.
Itai uri vhutshilo vhu ḓifhe sa vhuswa ha mutuku,
Vhuvhi mbiluni vhu shavhe nga luvhilo sa 'fene'.