Swiswi ḽa Mbilu Dambudzo

READ SAMPLE 

Nga ha bugu 

Swiswi ḽa mbilu dambudzo ndi bugu ya ḓirama ine ya amba nga vhalisa zwiḽa kale vha tshi khou dzi ya mathaga. Vhalisa vha lisa kholomo dza vhabebi vha livha Mufhohoni. Hanefha vha ḓo tshila nga u ḽa mitshelo ya ḓaka, u zwima phukha, u rafa ṋotshi na u ḽa tshithuvhi tsha mafhi. 

Bomboro: Tshi tshetsho tshe ra swika fhano Mufhohoni, ri khou tshila vhutshilo ha ḓaka, ha nzhota ndi u zhote-vho. Ri tea u edza vhabebi vhashu hangei mahayani. Vhabebi vhashu vho ṱoka midzi fhasi ha vhukoma ho khwaṱhaho. Kha ri ḓikhethele vhurangaphanḓa vhu re hashu fhano mathaga! ( Mihuvho ya madakalo.)

Ndi fhaḽa vha tshi tendelana u khetha vhukoma ha vhalisa. Vhavhili vho dzhenelela muṱaṱisano uyu ho vha Bomboro na Munakisi. Khetho dza bvela phanḓa, vha funaho Bomboro vha nanga ṱari ḽa Muembe ngeno vha funaho Munakisi ṱari ḽa Muhuyu. Khetho dzo ri u fhela ha wanala uri Munakisi ndi ene o kundaho. Bomboro na tshigwada tshawe vha hana mvelelo edzi.

Muluvhahoṱhe: Mune washu fhano mathaga ndi Bomboro. Vha sa funi vhurangaphanḓa hawe kha vha bve vha fhele vhuponi vhuno! Rine a ri ṱoḓi mavhanga vhuponi hashu! Ri tea u anḓana ra ṱhonipha vhukoma hashu. Vhane vha si ite ngauralo ndi mavhanga! Vhenevho vha ḓo pfiswa vhuṱungu! Tsha ḽivhanga ndi mushavho na u miliswa tshivhindi. Khosi ya vhalisa vhoṱhe ndi Bomboro nga tsha swili! (Mihuvho ya vha si gathi.)

Munakisi a lamba u tenda. A dzhia tshigwada tshawe a ṱuwa. 

Munakisi: Vhanga ntevheleni ri fhambane na magalatshane! Riṋe hashu vhurangaphanḓa ri a vhu ḓivha na u vhu hulisa! Khadani dzashu ri livhe Mungindini. (Mihuvho ya vhalisa vha funaho vhukoma ha Munakisi).

Ya vha yo takutshedza nndwa vhukati ha Gomana fhasi ha vhurangaphanḓa ha Bomboro na Maanḓa-nga-u-pfana fhasi ha vhurangaphanḓa ha Munakisi. 

Thandululo ya tshifhinga nyana yo vha ya u fhandekanya Mathaga uri tshigwada tshiṅwe na tshiṅwe tshi vhe na haho. 

Ḓuvha ḽitevhelaho, Bomboro u swika na tshigwada tshawe tsha Gomana tsho ambara zwiambaro zwa khakhe na berethe ntswu. U swika u amba milayo na mikano ine ya wela kha tshigwada tshawe. Munakisi a fhindula ari:

Munakisi: Ḽashu yaḽo mikano rine vhane vhaḽo ri a i ḓivha. Ḽeneḽo ro ḓiimisela u vhona tshuluwo ya dzofha tsingani dza misipha ya ṋama ya yashu mivhili. Thavha dza Ṱakaswi, Muhovhoya na Mungindini hu tshi katelwa na mulamboni wa Sanzhe u guma nga zwikwara zwa Ṋanḓoni. Henefho ri ḓo zhovha nyofho na ṱhoni ro kudza kule. Zwoṱhe zwi melaho na zwi titimaho vhaṅwe vhane a hu na arali hu si rine. (Mihuvho.)

Tshanḓa tsha Bomboro, Muluvhahoṱhe u ḓivhadza mulayo wa miri. 

Muluvhahoṱhe: Miri ya mitshelo i tea u vha fhasi ha vhune ha zwigwada! Vha sa weli fhasi  ha itsho tshigwada vha ḽa vho ranga vha humbela! Ngauralo nṋe ndi ta mihuyu yoṱhe, murungulu yoṱhe, misuma yoṱhe, mizwilu yoṱhe, miramba yoṱhe, minombelo yoṱhe na miembe yoṱhe na thavhi dzoṱhe. Izwi zwi amba uri ndaulo ya mitshelo iyi i wela fhasi ha Gomana. Vhapfukhi vha milayo vha pfiswe vhuṱungu. (Migwalabo.) 

Tshigwada tsha Munakisi tsha tenda-vho lini! A fhindula ari:

Munakisi: Riṋe mitshelo yoṱhe ri ḓo ḽa nga u kona ri songo humbela. Ane zwa mu kweta kha zwi mu kwete zwawe. Miri ya mupo a i na mune, kha ri ḓifushe ngayo roṱhe ro vhofholowa. 

Yo tswuka yo shoma! Ho vhifha tshoṱhe!