Mboho dza Venḓa

READ SAMPLE 

Nga ha bugu

“Shango ḽa shaya thovhele ndi muḽano! Shango a ḽi dzuli ḽi si na murangaphanḓa! Ri tshi bva hafha kha ri vhe ro khetha ṱhoho ya shango. Tshakha dziṅwe dzi na vhurangaphanḓa ho khwaṱhaho. Vhumbanani ni vhe ṅanda nthihi u itela mveledziso ya vhupo na tshitshavha tshashu.” Ndi muhaṱuli Maḓafula a no ralo o zwondolola marena a muno. 

Muṱaṱisano wa vhurangaphanḓa ha Venḓa ho vha vhukati ha Phundulu wa Ḽihoro ḽa Lushaka ḽa Venḓa ( L. L. V. ) na Vho-Luvhone vha Ḽihoro ḽa Vhathu ḽa Venḓa ( L. V. V. ). “Nṋe ndi kuḓuhulu kwa khosi khulu Dimbanyika. Vhurangaphanḓa hanga vhu ḓo ḓitika nga mvelele ya Vhavenḓa. Mahosi ndi vhone vhane vha ḓo vhusa lushaka!” A no amba nga u ralo ndi Phundulu

Phundulu ndi a dzama zwivhi ndi sia ndo ita o kunda Vho-Luvhone kha muṱaṱisano wa u vha ṱhoho ya shango. Nga murahu ha miṅwaha miṱanu Phundulu a ta ḓuvha ḽa khetho. Mvelele dza dzikhetho dzo sia ḽihoro ḽa L. V. V. ḽo kukuṱa vhunzhi ha madzulo a buthano sa khovhe. 

Phundulu u vhona zwo rali a vhamba maano na mahosi oṱhe a u renga dzikhetho. Ndayotewa ya shango ina tshiteṅwa tshi no bula uri ṱhoho ya shango u fanela u vha khosi. Mahosi a ṱutshela dzangano ḽa Vho-Luvhone, Phundulu u ḓo kona u vhuyelela tshiduloni naho khetho dzo ri L. V. V. ḽo kunda.

Vhagudiswa vha Tombo-ḽa-Ṅwali vho mbo ḓi thoma u khuruṱana vha thoma u matsha vho fara mabammbiri a no amba uri vhurangaphanḓa ha shango ho zwizwiedzwa. Kana zwo tou bva kha mini wee, a thi ḓivhi. “Ḓilugiseni Thuntshani!” Ndi kolonele Ravhuhali a no laela mapholisa nga u ralo. Shango ḽoṱhe ḽa dzhenwa nga nyofho musi vhuṱungu ha mme mubebi vhu tshi vhavha sa tshilonda tsha ṅwatela.