Nyambedzano Na Vhadzimu

1. Murendi ndi muthu-ḓe? 

Murendi ndi muthu wa bono a no vhona na zwine vhaṅwe vhathu vha si zwi vhone. U a kona u nakisa zwithu naho zwo vhifha nga maipfi. U a kona u fasha mihumbulo ya vhathu nga maipfi ane a  a shumisa. Ndi muthu a no vhona na zwi sa thu u bvelela, zwi ḓaho. A nga dzikuswa nga lufuno, vhuaḓa, mvelele, lunako, poḽitiki na zwiṅwe-vho zwi no bvelela tshitshavhani. U amba ngauralo zwi mu shandula mugwalabi, musasaladzi, mukhoḓi, muhanedzi kana muthemendeli wa zwithu. 

Kanzhi murendi u sumbedza tshitshavha nga ha vhuvhi vhu no khou bvelela shangoni. Izwi ndi u itela uri lushaka lu ḓivhone sa nga tshivhoni lu shanduke lu ite zwivhuya. U kaidza tshitshavha uri tshi litshe vhuvhi uri vhathu vhoṱhe vha dzule nga mulalo shangoni ḽe Muvhumbi a vha nea ḽone, vha tshi funana, u hulisana, u thusana na u vhavhalelana. 

2. Vhurendi ndi mini? 

Hovhu ndi vhutsila vhune miraḓo ya tshitshavha i si gathi ya vha naho. Murendi a nga ḓirenda kana u renda muṅwe muthu ngae, zwa dzhia madele mapfane zwa vhea vhunga hu si na muthu a sa ṱoḓi u rendiwa. 

Hoyu mushumo wo thoma henengei Matongoni, tsikoni ya vhathu. Vhurendi vhu shumisa maipfi o teaho nyito iyi. Izwi zwa takadza ane a khou ralo u khoḓwa kana u rendwa, a pfa hu tshi tou vha makwanḓani. 

Vhurendi kale ho vha vhu tshi rendwa nga u tou rwela maipfi ngomani, hu sa khathalei uri Murendi u a pfa zwine a khou amba zwone kana ha pfesesi naa? U kundwa u renda, mugudiswa a ralo u buniswa lu ṱungufhadzaho.

Nga ha bugu

Ino bugu yo katela zwirendo zwa mahumi matanu. Ndi zwirendo zwa u gwalaba. Zwi sumbedza u xela ha vhuthu kha vhathu. Zwi tutuwedza u kondelela sa thiko ya vhutshilo.