Zwikoloni Zwashu 2

Nga ha bugu 

Zwikoloni Zwashu 2 ndi bugu ya matshudeni a sekondari ine ya vha na nganeapfufhi dza fumi. Ndi bugu ine ya vhalea nga muthu muṅwe na muṅwe. Tshi ṱanganaho nganea edzi ndi fhethuvhupo vhune ha vha zwikoloni.

Nganeapfufhi edzi dzi kwama kha vhusiwana, u tambudziwa na pfanelo dza vhana dza u dzhena tshikolo. Dziṅwe dza nganeapfuthi ndi dzi tevhelaho.

Vho-Shenga

“Ndo neta nga magegulu a hangei masosani, zwino ndi vho tou ṱoḓa vhushenga-na-marambo vhune ha karusa muvhili wa gologodo ḽa vhuyelela tshikale muṱamvu u tshee na ṱhodzi. Tshilindamufula tshi linda tshi tshi ḽa, tshi ralo Tshivenḓa. Tshee ra ḽa vhana vha ndau ro fhedza ro itwa’ni? Ndi vhutshilo ha ḓaka, wa sa ḽa u a ḽiwa! Ee, houḽa ṅwananyana Tshiwela ya sa raha i ḓo ḓadza. Ndi fanela u mu shandula nḓuhu nkhoni nṋe ngeno ndo shanduka mbevha muḽi wa nḓuhu!” Ndi Vho-Shenga vha no amba nga u ralo vhe vhoṱhe vha tshi khou ambela mbiluni. 

Muvhigo Wa Masheleni

“Arali ndi nga bula uri masheleni a tshitshavha o zwizwiedzwa ndi nga vha ndi tshi khou zwifha naa?” Vha no vhudzisa nga u ralo vho vha Vho-Bella vha tshi khou setshelela. 

“Vhone nṋe vha tou mmbenga musi. Tshiṅwe na tshiṅwe tshi no itwa nga nṋe kha vhone tsho khakhea. Nṋe ndi songo tsha dzheniswa kha dzinyendo dza vhoiwe u bva ṋamusi! Ndo shumisa na tshelede yanga u foinela na u yo u ṱoḓa bisi. Zwino ndi vho pomokwa u vha mungalangadzi wa masheleni a lushaka, ḽiṅwe ḓuvha ndi ḓo zwi vhona nṋe mutuka nga khaladzi nga Tshiṱamune ṅwana wa mme anga muthihi fhedzi.” Ndi Vho-Bova vho silingea vhukuma. 

A ri vha vhengi!

Wo bula, ṱhama! Rine vhaṅwe a ri khou tou shuma mushumo nga nḓala lini, ri khou tou fhungadza na vhaṅwe. Hoyu mushumo u songo itwa u nga ndi wa tshiṱangani tsha muthu lini! Roṱhe hafha ro wana vhugudisi ho teaho nga u ralo ri ḓivha mushumo washu!” Ndi Vho-Phikhokho vha no amba nga u ralo. 

Tandala-tandala iyi yo ḓo hulela ya shanduka tsemano khulu. A hu na ane a ṱoḓa u pfa muṅwe. “Vhoiwe, vhaṱhannga, nṋe a thi lingani na vhoiwe lini! Ni songo nnyita Bobo donngi yo felaho u luga lini! A thi fhingudzwi nga dzikhanḓa hedzi nṋe uno! Vhuvhili ha vhoinwi ndo tou ni fasa ḽeri nṋe uno! Kha u fe mukhwa hoyo kha nṋe! Arali u mushumo ndi khou ṱoḓa nga maṱo matswuku haya mavhili! Ndi Mukumba a thi petwi nda petwa ndi apetuluwa! A thi itelwi nṋe wethu! Muvhango u muvhango-ḓe wonoyu!” Ndi Vho-Mukumba vho dzikuwa sa tshisima.