Zwikoloni Zwashu 1

Nga ha bugu

Zwikoloni Zwashu 1 ndi bugu ya matshudeni a sekondari ine ya vha na nganeapfufhi dza fumi. Ndi bugu ine ya vhalea nga muthu muṅwe na muṅwe. Tshi ṱanganaho nganea edzi ndi fhethuvhupo vhune ha vha zwikoloni. 

Nganeapfufhi edzi dzi kwama kha vhusiwana, u tambudziwa na pfanelo dza vhana dza u dzhena tshikolo. Dziṅwe dza nganeapfuthi ndi dzi tevhelaho.

Vhusiwana

“Mafhuri a anwela vha si na dzikhali ṅwana'nga. Ndo lingedza nga hune nda nga kona ngaho u ṱomba mahafhe uri ni vhuye ni fhedze hetshi tshikolo tsha Tshiṱambavhatei. Tsha sekondari hu pfi a tshi ḓuri zwone, nga u rengisa halwa ndi nga si tshi kone.” Vha no amba nga u ralo ndi Vho-Ṅwagomboza vho tou ṱungufhala. 

"Maano, kha vhuye!"

“Nṋe ndi khou dzinginya ḽa uri matshelo Vho-Makonyokonyo vha tshi ḓa nga pheriodo yavho roṱhe ri bvele nnḓa. Muthada i ḓo humela ofisini u vhiga itshi tshiwo ha ṱhohoyatshikolo. Ṱhohoyatshikolo vha tshi vhudzisa ri ḓo kona u vha kwashela mukumbu uri ṋemeṋeme dzi kone-ha u fhufha. U hani uyu muhumbulo?” A no amba nga u ralo ndi Biḓela a tshi khou ṅweṅwela. 

"Nṋe ndi nga si fhirwe nga hoyu!"

“Ṋamusi ndo takala nga maanḓa u vhona uri phangami ya gireidi ya malo ndi musidzana. Zwi dzhia miṅwaha i re na tshivhalo vhurangaphanḓa ha tshino tshikolo vhu zwanḓani zwa vhaṱhannga. Kha ri vha bandelele zwanḓa roṱhe! Mbeu dzoṱhe dzi a lingana, kha ri kwashe mbofho dza mvelele dzi no hoṱefhadza dziṅwe mbeu. Ṋamusi vhafumakadzi vha khou reila zwidimela na mabufho. Vhasidzana, vuwani, ndi kale mutsho wa ḓuvha wo andamela!” Ndi Vho-Muluṱanyi vha no ralo vha tshi khou thwethwenyea.