A Vha Ḓipfi

READ SAMPLE 

Nga ha bugu

Bugu eyi ndi bugu ya nganeapfufhi dza fumi ine ya pfi A VHA ḒIPFI . Ndi bugu i re na ndunzhe-ndunzhe ine ya takadza vhukuma. I dovha ya katela ngudo fhasi ha Ṱhoḓea dza Nganeapfufhi dzine dza lingedza nga nḓila dzoṱhe u gudisa vhaṅwe  vhaṅwali nḓila kwao ya u ṅwala na u sengulusa nganeapfufhi. U bva kha ṱhoho, mudzedze muthihi, tshivhumbeo kana puloto, vhaanewa, ṱhalutshedzo na mufhindulano, u ṱuṱula dzangalelo ḽa vhavhali na luambo na tshitaela. 

Ri thoma fhaḽa muṱani wa Vho-Musetsho kha nganea ya A vha ḓipfi vho ṱangana na khaedu khulu. Ṅwana wavho Tshigume are ngei Vhurwa nga pfunzo o vha kwama nga luṱingo a tshi vha vhudza uri hangei yunivesithi hu khou nyagea masheleni a zwigidi zwiṱanu zwa dzirannda nga tshihaḓu. 

"Ndi hune ra ḓo tou ita hani malugana na itshi tshira ri si na zwa ṋalani hu tshi katelwa na ngei ḓuluni ḽa hone, ndi amba ngei banngani. Ngoho vhusiwana vhu lidza nzhivha, ho lidza na khwali ya shango. Ṅwana'nga ndi hone zwa tshikolo zwo mu kunda zwo mu fhelela." Avha vho vha Vho-Londolani vho ḓaḓa sa tshiḓaḓa. 

Ri sathu ya na kule ri dzhena kha nganea ya Ro Dzudzanya Kale! Hafha ri ṱangana na mukalaha Vho-Makonḓelele na muḓuhulu wavho Tshigudu. Vhueni ho swika maḓautsha vhu tshi fhelekedza muṱanuni e a kovholwa nga Tshigudu. Vho-Makonḓelele vho ṱanganedza na u bvisa tshipfumelo nga murahu ha musi muḓuhulu wavho o tenda uri mihwalo ndi yawe. Mukalaha vha hulisa ḽa uri muṱanuni ha tsha vhuyela hayani hawe, u ḓo dzula na munna wawe fhano vhuhadzi uri a ḓo vha ene mulisa wa kholomo yavho arali i songo vhuya. Makhadzi a mukhovholwa vha lamba vhe mme a muṱanuni na mukwasha vho no dzudzanya zwoṱhe kale. 

"Riṋe zwe ra humbelwa zwone ndi u ḓa u ḓivhadza mulandu. Ḽe ḽa ombedzelwa vhukuma ḽo vha ḽa uri musi mafhungo o no fhela rine ri vhuye na khomba ya vhathu murahu ngauri vhomakhulu na mukwasha vho no vhofha zwe vha vhofha zwone kale." Vhane vha amba nga u rali ndi Vho-Nengwani makhadzi a mukovholwa.

Hei, ri ḓo vhona hune ha ḓo ya phuna na tshiṋoni. Ndi ngoho tshelede i na maanḓa, i luṱanya mukomana na murathu. A si hanefha kha nganea ya Danga Ḽa Kholomo he ra zwi vhona. Khevha Vho-Makheru nga murahu ha vhuṱambo ha Khushumusi na ṅwaha muswa vha tshi wana uri maḓuvha a u humela Vhurwa o no sendela vhukuma fhedzi tshelede ya u renga thikhithi ya tshidimela a vha na. Vha humbula u rengisa ṋamana nga mutengo wa fhasi vhukuma vha tshi itela uri mukomana Vho-Mungoza vha vhe na muhungo. Danga ḽa kholomo dza Vho-Mungoza ḽi tshi vho fema, hu vho pfala nyambo ya uri kha vha ri ndi vha fhe kuḓana kwavho ndi dzhie kholomo dzanga!

Bugu eyi ya nganeapfufhi dza fumi i na masiaṱari a 80. Dziṅwe nganea dzine dza ḓo vha takadza mbilu ndi Muḓi Wanga, Luṋanga lwa Phofu, Maauthi anga! - avha mufumakadzi vha tshi ri munna wavho Vho-Tshipaṋere vho vha wana vha tshi khou ḽa mugayo hangei ha khotsi avho. Vhe a vho ngo ḓela mugayo vhuhadzi. Vha pfa i mini yeneyi?, Ndi Mme anga! - nangoho shaka ndi bulayo, mutsinda ndi khwine, Shango Ḽithihi - U luvha a zwi na mapone, mahosi kha tondiwe sa zwiḽa kale, A Zwi Ri Mangadzi Hezwi na Ndi Vivho! - tshihadzinga a tshi ngo leluwa, luula muḓini wa mukalaha Vho-Phusuphusu ndi lwa ḓuvha ḽiṅwe na ḽiṅwe. Tshiitisi tshihulwane ndi uri mukalaha vha funesa lufarathonga u fhirisa mufumakadzi muhulwane.

Tshivenḓa tsho shumiswaho kha bugu eyi tsho ṱamba tsha dovha tsha sedzuluswa nga vhaṅwe vhaṅwali makone. Kha vha ḓo pfa kusuvhele kwa luambo lwe Mudzimu wa Vhavenḓa Ṅwali a ri tonda ngalwo. 

"Mugoḓoya kha ṱuwe na zwigoḓoya zwawe! A hu na ndi vivho heḽi! Kha i gube, u ende zwavhuḓi Muendeulu! Vhathu vhoṱhe vha takale henengei hune wa ya!" Avha vho vha Vho-Phusuphusu vha tshi khou sea tshiseo tshi no nga tsha mmbwa. 

Sa muṅwali, mbilu yanga yo ruḽa ngauri ndi a zwi ḓivha zwauri mushumo uri nga ngomu ha bugu eyi ya A VHA ḒIPFI  ndi wa maṱhakheni. Ndaa!