Makumba A Musuku

READ SAMPLE

Nga ha bugu

Bugu eyi ndi bugu ya nganeapfufhi dza fumi ine ya pfi MAKUMBA A MUSUKU. Ndi bugu i re na ndunzhe-ndunzhe ine ya takadza vhukuma. I dovha ya katela ngudo fhasi ha Ṱhoḓea dza Nganeapfufhi dzine dza lingedza nga nḓila dzoṱhe u gudisa vhaṅwe  vhaṅwali nḓila kwao ya u ṅwala na u sengulusa nganeapfufhi. U bva kha ṱhoho, mudzedze muthihi, tshivhumbeo kana puloto, vhaanewa, ṱhalutshedzo na mufhindulano, u ṱuṱula dzangalelo ḽa vhavhali na luambo na tshitaela. 

Ri thoma fhaḽa kha nganea ya Makumba a Musuku hune ra wana mbingano ya mufumakadzi Vho-Tshikinya na munna wavho Vho-Tshikwilimimba. Mbingano ya avha vhavhili yo ḓo vha kha tombo nga u shaea ha vhana. Mulindelo uyu wa fhedza wo dzhenisa Vho-Tshikwinya milingoni ya Muvhi. Ndi musi vha tshi vho thoma u bva nga dza mapfeṋe u vhona arali hu vhone vha re na mulandu. Vho ri u dzumbama nga murahu ha luhatsi zwithu zwa mbo ḓi naka vha gonya miri. Nga murahu ha miṅwedzi i sa paḓi fumi vha tsa mirini nga mbokoṱo. Mukalaha Vho-Tshikwilimimba. Vho-Tshikwilimimba hei ndavha vha nga vho i vhona fhedzi vhe munna u bebela munwe tenda a sa ḓo ruma.

"Ndi phambo ndi kudzela makumba a musuku nṋe! Vha songo ḓowela u nnyita nga u rali, thiri! Vhone kha vha ḓivhe wavho wa u renga zwiḽiwa na zwiambaro! Vhana vhanga vha songo vha kwama!"  Ndi Vho-Tshikwinya vha no ralo vho bilufhala vhukuma.

"Nne ndi mukukulume wa muumba, a thi kudzeli makumba! Mushumo wanga muhulwane ndi u palela khukhwana dza vhaṅwe ndodo dza u swalingedza!" Avha vho vha Vho-Tshikwilimimba vha tshi vhuyedzedza ḽivhi ḽo bviselwaho khagala. 

Samba ḽa vhuumba ḽi a vhavha ḽa dovha ḽa bora. 

Ri sathu ya na kule ri dzhena kha nganea ya Kha vha ḓe vha ḓi vhonele! Hafha ri ṱangana na mbingano ya Vho-Siṱafu na Vho-Shenga.  Ṱhanga dza dzi nnḓu dzo dzumba mafhungo a vhathu, nga khaladzi. Vho Siṱafu vha ṱanganedza luṱingo lwa uri kha vha ṱavhanye  vha ḓe vha tou ḓivhonele hafha tshikoloni tsha mukalaha wavho. 

“Kani ndi anea a vhuḓavhu ha Vho-Shenga ha u shenga vhafumakadzi vha vhaṅwe vhanna? Tshi re hone tshi hone, nga khaladzi nga Vho-Piet Muthumutswu. Ya sa raha ṋamusi i ḓo ḓadza! Ndi tou fara hei ya u dzhena nga tshivhana. A si zwenezwi, a tho ngo swika! Arali vhe na nyadzi ṋamusi i ḓo nnḓivha zwavhuḓi uri ndi pfi nnyi" Ndi Vho-Siṱafu vha tshi khou sokotela nga buli ḽa ḓaraṱa ya luhura. 

Ndi wau zwezwo u naye u amba ha Muriḓa. Vhuhadzi ndi ṋama ya thole ya fhufhuma ri a fhunzhela. 

Hei, ri ḓo vhona hune ha ḓo ya phuna na tshiṋoni. Ri ṱangana na nganea ine ya pfi Phungo! hune ra wana mukalaha Vho-Muvanya vha tshi ṱoḓa Tshibununu uri a vhe lufarathonga lwavho. Mufumakadzi wavho Vho-Vera vha rwisa ṱhoho na fhasi vhe ḽa ḓa hafha ḽi a kovhela. Tshihadzinga mukalaha vho tshi wana fhedzi mbilu ya Vho-Vera i tshi vhavha. "Vhe ḓuvha ḽi a ḓa muthu wanga o dzulela ngomu sa maṋo a khuhu, ha ḓivhi tshithu." Ndi Vho-Vera vha raliho.

Ndi ngoho, muvhulawa ha na maano, maano a na vhavhulai. 

Mafhungo a shango ha fheli hu fhela tshifhinga tsha u a anea. Vhaṅwe vhe nga ngei vhe Tshibubununu u vho fhufhisana na Vho-Muvanya a zwi naki zwone, zwi u naka zwa dzhia madelemapfane zwa vhea. Nga ngeno kha sia iḽi vhe Tshibubununu o ṅala munna nga mulandu wa Vho-Muvanya. Zwi re zwone a hu na a zwi ḓivhaho a zwi fhedza. 

Bugu eyi ya nganeapfufhi i na masiaṱari a 80. Dziṅwe nganea dzine vha ḓo dzi wana ndi Vhumatshelo Hanga, Kha Fhaṱuwe, Ndi Malabi, Ri ḓo vha awedza, Ṱhoho ya vhathu na Phangami Yashu - Khoyu Nduvheni ṅwana muhulwane wa muṱahabvu vhamusanda Vho-Rongo. Nga tshino tshifhinga u khou ḓishumela zwavhuḓi Haraḽiwei sa murengisi wa dzithikhithi. Nduvheni o lamba u vha mukoma wa Vhaṱavhatsindi. Nga murahu ha tshifhinga-nyana mushumo ha Raluwei wa fhela. Zwithu zwi a shanduka shangoni nahone zwi shanduka nga u ṱavhanya. Nga tshino tshifhinga u vho pfala a tshi ṅuṅuna sa phele a tshi ri u ṱoḓa vhuhosi hawe ha Luvhanga ḽa Vhaṱavhatsindi. 

Tshivenḓa tsho shumiswaho kha bugu eyi tsho ṱamba tsha dovha tsha sedzuluswa nga vhaṅwe vhaṅwali makone. Kha vha ḓo pfa kusuvhele kwa luambo lwe Mudzimu wa Vhavenḓa Ṅwali a ri tonda ngalwo. 

"Nṋe a thi kholwi uri hu na tshithu hafhaḽa! Ṅwana ha rengwi Shoprite lini! U ḓo zwi pfa nga u ḽa mindaandaane ya dziṅanga musidzana! Naho a ralo u nwa madzovhelo na u guma miuluso a hu na tshi ḓaho, khetshi nga khaladzi! Houḽa muthu vha mu ḓivhaho vha mu fhedza vhe o dzhulumbesa, ṋowa yawe yo kwangwala! U ḓo vhuya a tou renga ṅwana vhengeleni! " Ndi Seani a tshi khou sea na ṱhama dzawe. 

Sa muṅwali, mbilu yanga yo ruḽa ngauri ndi a zwi ḓivha zwauri mushumo uri nga ngomu ha bugu eyi ya Makumba a Musuku ndi wa maṱhakheni. Ndaa!