Nzumbululo

READ SAMPLE 

Nga ha bugu

Bugu eyi ndi bugu ya nganeapfufhi dza fumi ine ya pfi NZUMBULULO. Ndi bugu i re na ndunzhe-ndunzhe ine ya takadza vhukuma. I dovha ya katela ngudo fhasi ha Ṱhoḓea dza Nganeapfufhi dzine dza lingedza nga nḓila dzoṱhe u gudisa vhaṅwe vhaṅwali nḓila kwao ya u ṅwala na u sengulusa nganeapfufhi. U bva kha ṱhoho, mudzedze muthihi, tshivhumbeo kana puloto, vhaanewa, ṱhalutshedzo na mufhindulano, u ṱuṱula dzangalelo ḽa vhavhali na luambo na tshitaela. 

Ri thoma nganea ine ya pfi Basari ya tshikolo. Na vhudele na kuambarele ku a dzimisa mutshudeni thuso ya masheleni a u bveledza ngudo dzawe? Ni vhona hu mini zwo iteaho kha Percy o dalela ofisi ya zwa masheleni ngei yunivesithi ya Madevhula?

Majolika : Mushumisani, kha vha ḓo sedza badzhi na zwienda zwe a ambara zwone! 

Percy : Kani u tshi ḓa fhano ofisini iyi u fanela u ḓa u songo ambara? Badzhi na zwienda zwe nda ambara ndo tou ṱahaledzwa nga malume, hu na zwo khakheaho kani? 

Vho-Samu : Riṋe a ri fhi basari muthu a no ambara Flosheim na badzhi ya mukumba lini! I dzo nu u mmbudza, ni dzheniswa nga nnyi tshikolo? 

Ri sathu swika kule ri ṱanganedzwa nga nganea ya Ndaela. Tshithu tshi ofhisaho muthu ndi lufu, vhulwadze na u loiwa. Muthu o takala wa mu vhudza nga muloi dakalo ḽi a ṱhafha. Asi vhenevha Vho-Mabasha vha tshi ṅuṅuna sa phele. 

"Zwithu a zwi khou ḓivhalea hafha muṱani wanga! Mukegulu vho ri sia mahoḽa zwenezwino! Mufumakadzi wanga na vhana a vha na mutakalo. Hu khou itea mini muḓini wanga mara naa? Arali a muthu ane a vha murahu wa haya mafhungo  ndi ḓo fhafhara muthu nga mbaḓo masiari tshivhangalala ḓuvha ḽi nṱha ha ṱhoho!" Ndi Vho-Mabasha vha no ralo vha tshi khou ambela mbiluni vhe vhoṱhe vha tshi ita vha tshi dzungudza na ṱhoho. 

Vho-Mabasha vho dzhia tsheo ya u ranga vha vhonisa kha vhondiaḓivha. Muthu a vhea fulufhelo ḽa vhutshilo kha maine, hathoma u lovha maine, uḓo sala o tikiwa nga mini? Nahone muṅwe na muṅwe u ḓo ḓi swielela nḓila.

Hei, ri ḓo vhona hune ha ḓo ya phuna na tshiṋoni. Dzi a vhuya ndi shangoni. Vhaṅwe vhe nga roṱhe ri khou balelwa u vha na miṱa, kha hu vhuye zwiḽa zwa kale vhomakhulu vha ri ṱoḓele muthu. Kha nganea ya Mutshudeni Wanga ri wana khaladzi a Vho-Tshibonda Vho-Tshimbiluni vha tshi ima-ima vha ṱoḓela khaladzi avho khomba ine ya pfi Tshikero. Vho vhudza Tshikero uri u ḓo malwa nga muṱhannga muswa wa mutshudeni. Musidzana a ri u sedza mutshudeni ane a pfi u khou ḓo malwa ngae a wana o tou fa nga u wana, nzhololo ya muṱhannga. Hu ḓo itea mini musi mukalaha Vho-Tshibonda vha tshi ḓi vhonadza? Ngoho mazwifhi ha vhuedzi tshithu vhutshiloni.

“Havha munna vhe tshibonda vha dovha vhe mbifho i no nga ya ḽithavhani. Naho vha tshi ri munna ha naki u naka zwanda zwawe, Vho-Tshibonda hafhu na zwa ṋalani vha si na! Mushumo ndi u ṱwa madavhani muthada i tshi tshina malende. Heḽi dzhatsha ndi khou ḽi vhoniswa nga Vho-Tshimbiluni vhe vha mphura vhe vha nnyambisela khaladzi avho Bukuṱa wa mutshudeni, mathina ndi vhumbulu he vha vhofha na heḽi galaha. Ndi hune nda ḓo tou pfi wa ha nnyi nṋe ṅwana?” Ndi Tshikero a no amba nga u rali o ṱungufhala.

Bugu eyi ya nganeapfufhi i na masiaṱari a 80. Dziṅwe nganea dzine dza ḓo vha takadza mbilu ndi Ri ḓo vha awedza, Nzumbululo, Mukwasha wanga!, Mafhelo a vhege, Vho-Mmege, Ndi ngani? na Moḓoro wanga! - Muthu ha nukhi a tshi khou tshila. Khevha Vho-Matshaya vho dzhena vhengeleni ḽa dzi goloi dza BMW vha sumba goloi ntswa ya nwaha wonowo. Murengisi a vha sedza nṱha na fhasi a ri vha nga si kone mbadelo yayo. Vho-Matshaya vha ṅala vha ya u ṱoḓa goloi huṅwe.

"Havha vhathu vha a mangadza, vho ḓa mushumoni hone a vha ṱoḓi u shumela vhathu. Muthu a tshi u humbela thuso u fanela u mu thusa u songo ranga wa sedza nyimele yawe. A vha zwi ḓivhi uri maṱo ashu ha vhoni zwi re zwone kana? Vhathu kha vha litshe u khirema mukegulu nga ṅwenda!" Ndi vhominidzhere vha no amba nga u ralo. 

Tshivenḓa tsho shumiswaho kha bugu eyi tsho ṱamba tsha dovha tsha sedzuluswa nga vhaṅwe vhaṅwali makone. Kha vha ḓo pfa kusuvhele kwa luambo lwe Mudzimu wa Vhavenḓa Ṅwali a ri tonda ngalwo. 

“Ndi nṱhani ha tshibonda tshavho khaladzi, hei phanzi ro vha ri sa ḓo ṱangana nayo! Vhana vha zwino a vha tsha tenda u ḓibaḓekanya na migologodo i no nga sa vhone lini. Ri ḓo tou vha ṱoḓela tsha ḽiṱo ḽithihi khamusi tshone a tshi nga ri ṱanganyisi na buluvhutsi iḽi. Ndo palea sa mufuvha nṋe ṅwana wa Manyawedza! U hanya ndi u vhona nyika nga khotsi anga vha re mavuni! Vhakale vho amba vhe ni ḓo sala ni tshi zwi vhona, a si zwenezwi! Zwithu zwa maḓuvhaano zwo shanduka, ndi kale ri tshi shuma nga u rali rine!” Vha no amba nga u rali ndi Vho-Tshimbiluni.

Sa muṅwali, mbilu yanga yo ruḽa ngauri ndi a zwi ḓivha zwauri mushumo uri nga ngomu ha bugu eyi ya NZUMBULULO ndi wa maṱhakheni. Ndaa!